ކޮމިޝަނަރ އޮފް ޕޮލިސް އަޙްމަދު މުޙައްމަދު، ޗީފް އޮފް ޑިފެންސް ފޯސް މޭޖަރ ޖެނެރަލް އިބްރާޙީމް ޙިލްމީއާ އިއްޔެ ބައްދަލުކުރައްވައިފިއެވެ.
ދިވެހިރާއްޖޭގެ ގައުމީ ދިފާއީ ބާރުގެ މައި މަރުކަޒު، ބަންޑާރަކޮށީގައި ބޭއްވުނު މި ބައްދަލުކުރެއްވުމަކީ، އަޙްމަދު މުޙައްމަދު ކޮމިޝަނަރ އޮފް ޕޮލިސްގެ މަގާމާ ހަވާލުވެވަޑައިގަތުމާ ގުޅިގެން ބޭއްވުނު ތައާރަފުވުމުގެ ބައްދަލުވުމެކެވެ. މި ބައްދަލުވުމުގެ މައިގަނޑު މަގުސަދަކީ ދިވެހި ފުލުހުންގެ ހިދުމަތާއި ދިވެހިރާއްޖޭގެ ގައުމީ ދިފާއީ ބާރުގެ މެދުގައި އޮންނަ ގުޅުން އިތުރަށް ހަރުދަނާކޮށް ބަދަހިކުރުމެވެ.
މި ބައްދަލުވުމުގައި، ރާއްޖޭގެ ދާޚިލީ އަދި ޚާރިޖީ ސަލާމަތާއި ރައްކާތެރިކަން ކަށަވަރުކުރުމުގައި ދެ މުއައްސަސާ ގުޅިގެން މަސައްކަތް ކުރެވޭނެ ދާއިރާތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. މީގެ އިތުރުން، ކުރިމަތިވާ އެކިއެކި ގޮންޖެހުންތަކުން އަރައިގަތުމުގައި ދެ މުއައްސަސާގެ މެދުގައި އޮންނަ އެއްބާރުލުން މިހާރަށްވުރެ ހަރުދަނާކުރުމަށް ދެ ބޭފުޅުން ވަނީ އިއްތިފާގުވެވަޑައިގަންނަވާފައެވެ.
މި ބައްދަލުވުމުގައި ދިވެހި ފުލުހުންގެ ހިދުމަތާއި އެމް.އެން.ޑީ.އެފްގެ އިސް ބައެއް ވެރިން ބައިވެރިވެވަޑައިގެންނެވިއެވެ. ކޮމިޝަނަރ އޮފް ޕޮލިސް އަޙްމަދު މުޙައްމަދު މި މަގާމަށް އައްޔަންކުރައްވާފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައެވެ.
