މިދިޔަ ހަފްތާގައި މާލެ އާއި ސިނަމާލޭ ބްރިޖާއި ހަލި މަގުގައި 56 އެކްސިޑެންޓް ހިނގާފައިވާ ކަމަށް ފުލުހުން ވިދާޅުވެއްޖެއެވެ.
ފުލުހުން ނެރެފައިވާ ތަފާސްހިސާބުތަކުން ދައްކާ ގޮތުގައި މާޗް މަހުގެ 22 އިން ފެށިގެން 28 އަށް ޖުމްލަ 56 އެކްސިޑެންޓް ހިނގާފައިވާއިރު، އޭގެ ތެރެއިން އެއް ދުވަސް މަތިން އެންމެ ގިނަ އެކްސިޑެންޓް ހިނގާފައިވަނީ މިދިޔަ މަހުގެ 25 ވަނަ ދުވަހެވެ.
- 22 މާޗް 8 އެކްސިޑެންޓް،
- 23 މާޗް 9 އެކްސިޑެންޓް،
- 24 މާޗް 7 އެކްސިޑެންޓް،
- 25 މާޗް 13 އެކްސިޑެންޓް،
- 26 މާޗް 5 އެކްސިޑެންޓް،
- 27 މާޗް 10 އެކްސިޑެންޓް،
- 28 މާޗް 4 އެކްސިޑެންޓް،
ތަފާސްހިސާބުތަކުން ދައްކާ ގޮތުގައި އެ މުއްދަތުގައި އެންމެ ގިނައީ ސައިކަލާއި ކާރު ޖެހިގެން ހިނގާފައިވާ އެކްސިޑެންޓެވެ. އެފަދަ 14 އެކްސިޑެންޓެއް ހިނގާފައިވެއެވެ. އަދި ސައިކަލާއި ސައިކަލު ޖެހުނު 13 އެކްސިޑެންޓެއް ހިނގާފައިވާ ކަމަށްވެސް އެ ތަފާސްހިސާބުތަކުން ދައްކައެވެ.
މި މުއްދަތުގައި އެންމެ ގިނަ އެކްސިޑެންޓްތައް ހިނގާފައިވަނީ ދުވާލު ގަޑީގައެވެ. ދުވާލު 37 އެކްސިޑެންޓް ހިނގާފައިވާއިރު، ރޭގަނޑު ހިނގާފައިވަނީ 19 އެކްސިޑެންޓް ކަމަށް ފުލުހުންގެ ތަފާސްހިސާބުތައްކުން ދައްކައެވެ.
މިދިޔަ ހަފްތާގައި ހިނގި އެކްސިޑެންޓްތަކަށް ބަލާއިރު، އެކަކަށް ސީރިއަސް އަނިޔާވެފައިވާއިރު 55 މީހަކަށް އެކިވަރުގެ އަނިޔާތައް ލިބިފައިވާ ކަމަށް ވެސް ތަފާސްހިސާބުތަކުން ދައްކައެވެ.
އަދި އެ މުއްދަތުގައި ހިނގި އެކްސިޑެންޓްތަކުން 65 އުޅަނދަކަށް ވަނީ އެކި ވަރުގެ ގެއްލުން ވެފައެވެ.
